OORDENKING

Maandag 24 Augustus
Die Here, my herder

Psalm 23

’n Ongelooflike belydenis. Dit is wat ons vandag by die digter hoor, want wie is daar wat kan sê dat hy alles het wat nodig is, wie se lysie van kortkom dinge nie meer bestaan nie? In ons wêreld van strewe na meer en hoër, wie is daar wat vrede het met die lewe? En tog is dit juis die digter se belydenis: “Ek kom niks kort nie”. Nie in eet of drink nie. Nie in beskerming nie. Nie in kennis en leiding nie. Die volle vrede. Hoe kry die digter dit reg om so te voel? Want die Here is sy herder. Die herder versorg die kudde met alles wat nodig is. Hulle ken Sy stem en volg hom gewillig. Hy sorg dan dat hulle alles beleef wat hulle nodig het.
So roep die Goeie Herder ook vir ons. Hy verklaar ons tot Sy kudde. As ons Sy stem ken en hoor as Hy roep; dan volg ons Hom. Dit verander die hele lewe. Dit breek elke dag en ook die ewigheid oop met alles wat ’n mens sou kortkom. Dit maak ons kinders in Sy huis wat by Sy tafel kan aansit en wat ’n ewige ruimte vind by die Vaderhuis wat vir ons voorberei is. Dit maak ons ryklik geseënd om meer te ontvang as wat ons nodig het. Om die Herder te kan hê, verander elke tekort in genoegdoening omdat ons ook Sy ongelooflike seën raaksien en erken. Die kudde is dan tevrede om te leef na die rigsnoer en leiding van die Herder.
Dit is dus om onder alle omstandighede die vrede te ontvang wat alle verstand te bowe gaan en dit laat ’n mens bely: “Ek kom niks kort nie”, want die Here is my Herder.
Ds. Johan van Wyk, Wes-Rand

𝔊𝔢𝔩𝔬𝔬𝔣𝔰𝔟𝔬𝔫𝔡 𝔳𝔞𝔫 ℌ𝔢𝔯𝔳𝔬𝔯𝔪𝔡𝔢 𝔊𝔢𝔪𝔢𝔢𝔫𝔱𝔢𝔰 Lewensbrood 2026 - (CC BY-NC-ND)